تعلیم نسواں کے بغیر ہم ترقی یافتہ سماج کی تشکیل نہیں کرسکتے

<p>از قلم: ریاض قادری،میں امام و خطیب مسجد صفا ،رجہت شریف نوادہ (بہار)</p>
<p>تعلیم نسواں نئے دور کی ایک اہم ضرورت ہے۔ خواتین کے تعلیم یافتہ ہوئے بغیر ہم ملک کے روشن مستقبل کا تصور نہیں کر سکتے۔ خاندان ، معاشرے اور ملک کی ترقی میں خواتین کا کردار بہت اہم ہے۔ ہندوستان کی جمہوریت کو کامیاب بنانے کا واحد طریقہ یہ ہے کہ خواتین اور مردوں کو تعلیم حاصل کرنے کے مساوی حقوق دیئے جا ئیں۔ صرف تعلیم یافتہ خواتین ہی ملک معاشرےاور کنبے میں خوش حالی لا سکتی ہیں یہ بیان بالکل درست ہے کہ مرد صرف ایک شخص کو تعلیم دے سکتا ہے لیکن ایک عورت پورے معاشرے کو تعلیم دے سکتی ہے جس کے ذریعے پورے ملک کو تعلیم دی جا سکتی ہے۔ آج خواتین کی تعلیم کی اہمیت کو تسلیم کرنا بہت ضروری ہے کیونکہ وہ اپنے بچوں کی پہلی استانی ہے جو آگے بڑھ کر قوم کی تخلیق کو ایک نئی شناخت دے گی۔ کسی بھی بچے کا مستقبل اس کی والدہ کی طرف سے دیئے گئے پیار اور پرورش پر منحصر ہوتا ہے جو صرف ایک عورت ہی کر سکتی ہے۔ ہر بچہ اپنی زندگی کی پہلی تعلیم اپنے ماں سے حاصل کرتاہے۔ لہذا ماں کے لئے تعلیم یافتہ ہونا بہت ضروری ہے کہ وہ اپنے بچے میں ایسی خصوصیات ڈال سکے جو ان کی زندگی کو صحیح سمت دے سکے۔ تعلیم یافتہ خواتین نہ صرف بچوں بلکہ آس پاس کے بہت سارے لوگوں کی زندگیوں کو بھی تبدیل کرسکتی ہیں جو ملک کی ترقی میں اہم کردار ادا کر سکتی ہیں۔ ایک عورت اپنی زندگی میں بہت سے رشتے ادا کر تی ہے جیسے ماں، بیٹی،بہو،بہن ،اور بیوی کسی بھی رشتے میں آنے سے پہلے وہ عورت ملک کی آزادی شہری ہے اسے اپنی خواہش کے مطابق تعلیم لینے کا حق ہے تا کہ وہ اپنے پسندیدہ شعبے میں کام کرسکے۔ تعلیم خواتین کو اپنے پیروں پر کھڑے ہو نے اور انھیں خود پر انحصار کرنے میں مدد کرتی ہے۔ تعلیم نہ صرف معاشرے میں خواتین کا معیار بلند کرتی ہے بلکہ معاشرے کی تنگ سوچ بھی ختم کرتی ہے جس میں انھیں اپنے والدین پر بوجھ کے طور پر دیکھا جاتا ہے۔</p>